Istanbuldagi suv toshqinlari: qurbonlar soni to‘rt kishiga yetdi
Istanbulda bir kunda har kvadrat metrga 261 millimetr yog‘ingarchilik qayd etilib, shaharning zamonaviy tarixidagi eng yuqori ko‘rsatkich kuzatildi.
Turkiyaning Istanbul shahrida kuchli va uzluksiz yomg‘ir oqibatida yuzaga kelgan suv toshqinlari qurbonlari soni to‘rt kishiga yetdi.
“Anadolu” agentligi xabariga ko‘ra, halok bo‘lganlardan biri Istanbulning Beykoz tumanidagi maktab qurilishida ishlagan. U kuchli yomg‘irdan keyin suvga to‘lgan quduqni bo‘shatishga urinayotganda muvozanatini yo‘qotib, quduqqa tushib ketgan. Erkak shifoxonaga yetkazilgan, biroq shifokorlar uning hayotini saqlab qola olmagan.
So‘nggi uch kun ichida qutqaruv xizmatlari 3 057 kishini evakuatsiya qilib, xavfsiz joylarga olib borgan.
Istanbul gubernatori Dovut Gulning maʼlum qilishicha, chorshanba kuni shaharda har kvadrat metrga 261 millimetr yog‘ingarchilik qayd etilgan. Bu shaharning zamonaviy tarixidagi eng yuqori ko‘rsatkich hisoblanadi. Payshanba kuni ham ayrim hududlarda kuchli yomg‘ir davom etgan.
Sinoptiklar juma kunidan boshlab Istanbulda yana kuchli yog‘ingarchilik kuzatilishini, shanba kuni esa yog‘in miqdori har kvadrat metrga 60 millimetrga yetishi mumkinligini prognoz qilgan.
Kuchli yog‘ingarchilik Turkiyaning boshqa hududlariga ham taʼsir ko‘rsatgan. Istanbuldan tashqari Zonguldak, Yalova, Kojaeli, Dyuzdje va Sakariya viloyatlaridagi taʼlim muassasalarida darslar to‘xtatilgan.
