Kamerani tepib sindirdi: Chilonzorda ikki yigit 3 sutkaga qamaldi

 

Toshkent shahrining Chilonzor tumanida ko‘p qavatli uy kirish yo‘lagiga o‘rnatilgan kuzatuv kamerasini tepib sindirgan yigitlar aniqlandi. Bu haqda Toshkent shahar Ichki ishlar bosh boshqarmasi matbuot xizmati xabar berdi.

 

Ma’lum qilinishicha, hodisa yarim tunda sodir bo‘lgan. Aniqlangan uch nafar shaxsdan ikkitasi 2004 va 2005-yillarda tug‘ilgan, uchinchisi esa voyaga yetmagan. Tekshiruv davomida ikki yigit spirtli ichimlik iste’mol qilgani aniqlangan.

 

Kamerani sindirganini tan olgan yigit qilgan ishidan pushaymonligini bildirgan. Uning aytishicha, u do‘sti bilan restoranda spirtli ichimlik iste’mol qilganidan so‘ng mahallani aylanib, ko‘p qavatli uyning kirish yo‘lagiga kirgan va ikkinchi qavatdan tushayotib kamerani sindirgan. U sodir etgan ishi uchun uzr so‘ragan.

 

Holat yuzasidan Ma’muriy javobgarlik to‘g‘risidagi kodeksning 183-moddasi — mayda bezorilik hamda 194-moddasi — ichki ishlar organi xodimining qonuniy talablarini bajarmaslik bo‘yicha ma’muriy bayonnoma rasmiylashtirilib, sudga yuborilgan.

 

Jinoyat ishlari bo‘yicha Chilonzor tumani sudi qarori bilan ikki yigitga 3 sutkadan ma’muriy qamoq jazosi tayinlangan.

 

Voyaga yetmagan shaxsni maxsus nazoratga olish masalasini ko‘rib chiqish uchun Toshkent shahar hokimligi huzuridagi Voyaga yetmaganlar ishlari bo‘yicha komissiyaga taqdimnoma kiritilgan.