Migrantlar uchun yangi taqiq: Sankt-Peterburgda qaysi sohalarda ishlash mumkin emas?
Yangi taqiq 2026-yil oxirigacha amal qiladi.
Rossiyaning Sankt-Peterburg shahrida patent asosida ishlaydigan xorijiy fuqarolarni bir qator sohalarda ishga yollash taqiqlandi. Cheklovlar chakana savdo do‘konlari, go‘zallik salonlari, sartaroshxonalar, massaj salonlari va tibbiyotning ayrim yo‘nalishlarini qamrab oladi. Bu haqda shahar ma’muriyati matbuot xizmati ma’lum qildi.
Shahar gubernatori Aleksandr Beglovning qarori bilan 2026-yil oxirigacha amal qiladigan cheklovlar ro‘yxati kengaytirildi. Unga jismoniy tarbiya va sog‘lomlashtirish xizmatlari, ayrim tibbiy faoliyat turlari ham kiritilgan.
Taqiq Yevroosiyo iqtisodiy ittifoqiga a’zo davlatlar — Belarus, Qozog‘iston, Armaniston va Qirg‘iziston fuqarolariga tatbiq etilmaydi. Shuningdek, ish ruxsatnomasiga ega yuqori malakali xorijiy mutaxassislar ham cheklovdan mustasno.
Ish beruvchilarga mehnat faoliyatini yangi talablarga moslashtirish uchun 15-dekabrgacha muddat berilgan.
Shahar ma’muriyati taqiqni norasmiy bandlikka qarshi kurashish, mehnat bozorida qonuniylikni ta’minlash va Rossiya fuqarolari, jumladan, yoshlar hamda talabalar uchun ish o‘rinlarini saqlab qolish chorasi sifatida izohlagan.
Eslatib o‘tamiz, 2025-yil dekabrida Aleksandr Beglov 2026-yil oxirigacha patent asosida ishlaydigan migrantlarni taksi haydovchisi va kuryer sifatida ishga yollashni taqiqlovchi farmonni ham imzolagan edi.
