O‘zbekiston, Qozog‘iston va Rossiya hamkorligi: xalqaro narkosavdo guruhi fosh etildi
Musodara qilingan 30 kilogramm gashishning qora bozordagi qiymati taxminan 300 ming dollarga baholanmoqda.
Qozog‘iston, O‘zbekiston va Rossiya maxsus xizmatlari hamkorligida Afg‘onistondan giyohvand moddalar kontrabandasini amalga oshirgan xalqaro guruh fosh etildi. Bu haqda Qozog‘istonning Tengrinews.kz nashri mamlakat Milliy xavfsizlik qo‘mitasi ma’lumotlariga tayanib xabar berdi.
Ma’lum qilinishicha, giyohvand moddalar Afg‘onistondan “Shimoliy yo‘nalish” deb ataluvchi kanal orqali olib o‘tilgan.
Rossiyaning Tyumen shahrida o‘tkazilgan tezkor tadbir davomida xalqaro giyohvand moddalar savdosi bilan shug‘ullangan guruhning ikki a’zosi qo‘lga olingan. Tintuv paytida ulardan 30 kilogramm afg‘on gashishi musodara qilingan.
Qozog‘iston Milliy xavfsizlik qo‘mitasi ma’lumotiga ko‘ra, musodara qilingan moddaning qora bozordagi qiymati taxminan 300 ming dollarga baholanmoqda.
Mazkur holat yuzasidan Rossiya vakolatli organlari tomonidan sudgacha tergov harakatlari olib borilmoqda.
