Talabalar ko‘chalarga chiqdi: Albaniyada hukumatga qarshi namoyishlar avj oldi
Mamlakat bosh vaziri hukumatga qarshi namoyishlar ortida “tashqi kuchlar” turganini da’vo qildi.
Albaniya poytaxti Tirana shahrida Bosh vazir Edi Ramaning iste’fosini talab qilayotgan namoyishchilar va politsiya o‘rtasidagi to‘qnashuvlar bo'lmoqda. Namoyishlar chog‘ida hukumat binolariga hujumlar uyushtirilib, ayrim inshootlarga zarar yetkazilgan.
Namoyishlar seshanba kuni boshlangan va keyinchalik mamlakatning boshqa shaharlariga ham tarqalgan. Payshanba kuni namoyishchilar Ta’lim vazirligi va parlament binosi yaqinida to‘plangan. Ularning parlamentga kirishga urinishlari sababli majlis faoliyati ham uzilib qolgan.
Politsiya namoyishchilarni tarqatish uchun ko‘zdan yosh oqizuvchi gaz va suv to‘plaridan foydalangan. Namoyishchilar esa huquq-tartibot xodimlariga tosh otib, ko‘chalarda chiqindilarni yoqish va yo‘llarni to‘sish kabi harakatlarni amalga oshirgan. Politsiya ma’lumotiga ko‘ra, payshanba oqshomida boshlangan zo‘ravonliklar ortidan 160 kishi hibsga olingan.
Namoyishchilarning asosiy qismini yoshlar va talabalar tashkil etmoqda. Ular korrupsiyaga qarshi kurashish, narxlar oshishini to‘xtatish va ta’lim tizimini isloh qilishni talab qilmoqda. Ayrim ishtirokchilar hukumatning noroziliklarga munosabatini ham tanqid qilgan.
Noroziliklarning muhim sabablaridan biri AQSh prezidenti Donald Trampning kuyovi Jared Kushner bilan bog‘liq turizm loyihasidir.
Loyiha tanqidchilari uni korrupsiya va jamiyatdagi tengsizlik bilan bog‘liq muammolarning ramzi sifatida ko‘rmoqda. Hukumatga qarshi noroziliklar esa bir necha oydan beri davom etib kelayotgan edi.
Albaniya bosh vaziri Edi Rama juma kuni videomurojaat orqali namoyishchilarning tinchlikni saqlashga chaqirgan. Shu bilan birga, u tartibsizliklar ortida Albaniyada beqarorlikni istayotgan “tashqi kuchlar” turganini da’vo qilgan.
Yevropa Ittifoqining Albaniyadagi delegatsiyasi ham vaziyat yuzasidan xavotir bildirib, rasmiylarni namoyishlarga mutanosib javob qaytarishga chaqirgan.
