Toshkentda aliment to‘lamay yurgan ota qidiruvda topildi
Erkakka nisbatan maʼmuriy qamoq jazosi tayinlangach, u 164 mln qarzini to‘lashga majbur bo‘lgan.
Majburiy ijro byurosi Mirzo Ulug‘bek tuman bo‘limi ish yurituvidagi fuqarolik ishlari bo‘yicha Mirzo Ulug‘bek tumanlararo sudining 2018 yil 2 iyundagi ijro hujjatiga asosan qarzdor R.Yu.dan undiruvchi U.Yu. foydasiga voyaga yetmagan bir nafar farzandi taʼminoti uchun har oyda ish haqi va boshqa daromadlarining to‘rtdan bir qismi miqdorida aliment undirish belgilangan.
Biroq qarzdor bir necha bor ogohlantirilganiga qaramay, aliment to‘lovlarini o‘z vaqtida amalga oshirmagan. Uning turgan joyini aniqlash imkoni bo‘lmaganligi sababli qidiruv choralari ko‘rilgan. Natijada to‘plangan aliment qarzdorligi 164 million 586 ming 316 so‘mni tashkil etgan.
Majburiy ijro byurosi Toshkent shahar boshqarmasi Qidiruv sho‘basi xodimlari tomonidan olib borilgan qidiruv tadbirlari natijasida qarzdor aniqlanib, tuman bo‘limiga olib kelingan. Jinoyat ishlari bo‘yicha Mirzo Ulug‘bek tuman sudining 2026 yil 15 oktyabrdagi qarori bilan unga nisbatan 15 sutka maʼmuriy qamoq jazosi tayinlangan.
Ko‘rilgan choralar natijasida qarzdordan 164 million 586 ming 316 so‘m miqdoridagi aliment qarzi undirilgan.
