Isroillik ko‘chmanchilar diplomatlarga hujum qildi: Fransiya meri ham kaltaklandi
Delegatsiya falastinlik zaytun yig‘uvchilar holidan xabar olish uchun bosib olingan G‘arbiy Sohilga kelgan.
Bosib olingan G‘arbiy Sohildagi Taybeh qishlog‘i yaqinida isroillik ko‘chmanchilar yevropalik diplomatlar va Fransiya meriga hujum qildi. Shanba kuni delegatsiya falastinlik zaytun yig‘uvchilar holidan xabar olish uchun kelganida, isroillik ko‘chmanchilar ularga qarshi chiqqan.
Belgiya tashqi ishlar vaziri Maksim Prevo ma’lum qilishicha, hujum vaqtida Belgiyaning bosh konsuli, Fransiya va Polsha diplomatlari hamda katolik cherkovi vakillari nishonga olingan. Fransiyalik mer Bernar Bodu hujumga uchragan, Belgiya avtomobiliga zarar yetkazilgan.
Fransiya tashqi ishlar vaziri Jan-Noel Barro Isroilni hujumda ishtirok etgan ko‘chmanchilarni hibsga olish va javobgarlikka tortishga chaqirdi. Belgiya ham hodisani qoraladi.
Al Jazeera muxbiri Nur Odehning xabar berishicha, hujumchilar diplomatlarning avtomobillarini qurshab olib, ularga tosh otgan va oynalarini sindirgan. Hodisa yuzasidan Isroil politsiyasi tergov boshlagan.
Isroil bosh vaziri Binyamin Netanyaxu idorasi esa hujum haqidagi xabarlar ishonchli dalillar bilan tasdiqlanishi kerakligini bildirgan.
Ma’lumot uchun, hujumdan bir kun oldin ham isroillik ko‘chmanchilar Ramalloh shimolida AQSHlik jurnalistga hujum qilgan edi. Ko‘chmanchilarning zo‘ravonliklari bosib olingan G‘arbiy Sohilda falastinliklarning zaytun hosilini yig‘ishiga ham to‘sqinlik qilmoqda.
