Marko Rubio: “O‘zbekiston bilan hamkorlik biz uchun muhim”
AQSh Davlat kotibi Marko Rubio O‘zbekistonga tashrifi arafasida nega aynan hozir, dunyoda inqirozlar avj olgan bir paytda Samarqandga yo‘l olgani haqidagi savolga javob berdi.
Rubio O‘zbekiston bilan munosabatlarni strategik ahamiyatga ega deb atadi. Uning ta’kidlashicha, bu safar biror inqiroz yoki muammo sababli emas, aynan hamkorlikni mustahkamlash maqsadida amalga oshirilmoqda.
“Shunday davlatlar borki, ular bilan munosabatlarimizni rivojlantirish uchun borishni istaymiz”, — dedi Davlat kotibi.
Rubio O‘zbekiston va qo‘shni Markaziy Osiyo davlatlari bilan aloqalarni mustahkamlash AQSh tashqi siyosatining muhim yo‘nalishi ekanini qayd etdi.
Davlat departamenti xabariga ko‘ra, Rubio 17–22 oktyabr kunlari Samarqand hamda Hindistonning Mumbay va Jamnagar shaharlariga tashrif buyuradi.
Samarqand tashrifning ilk manzili bo‘ladi. Bu yerda u C5+1 formatidagi vazirlar uchrashuvida ishtirok etadi va O‘zbekiston rahbariyati bilan muzokaralar o‘tkazadi. Muzokaralarda savdoni kengaytirish, xususiy sektor investitsiyalarini jalb qilish va mintaqada iqtisodiy modernizatsiyani qo‘llab-quvvatlash masalalari muhokama qilinishi kutilmoqda.
Tashrifning yana bir muhim jihati — Davlat kotibi bilan birga Samarqandga 200 dan ortiq biznes yetakchilaridan iborat AQSh tijorat delegatsiyasi keladi. Bu ikki davlat o‘rtasidagi iqtisodiy hamkorlikda yangi bosqich boshlanayotganidan dalolat beradi.
So‘nggi yillarda Toshkent va Vashington o‘rtasidagi aloqalar sezilarli darajada kengaydi. O‘zbekiston va AQSh energetika, transport, muhim foydali qazilmalar, raqamli texnologiyalar va qishloq xo‘jaligini qo‘shma loyihalar uchun ustuvor sohalar sifatida belgilagan.
Ramziy jihati ham bor: C5+1 platformasi 2015-yilda tashkil etilgan bo‘lib, uning ilk vazirlar uchrashuvi aynan Samarqandda o‘tkazilgan. Oradan o‘n yildan ortiq vaqt o‘tib, format yana qadimiy shaharga qaytmoqda.
