Saudiya Arabistonida vertolyot quladi: ikki ekipaj a’zosi halok bo‘ldi
Rasmiylar bunga texnik nosozlik sabab bo‘lganini bildirgan, Yamandagi husiylar esa vertolyot raketa bilan urib tushirilganini da’vo qilmoqda.
Saudiya Arabistonining Najran viloyatida AH-6i rusumli razvedka vertolyoti qulab tushdi. Hodisa oqibatida ikki nafar ekipaj a’zosi halok bo‘ldi. Bu haqda Saudiya Arabistoni boshchiligidagi koalitsiya vakili Turki al-Malikiy ma’lum qildi.
Bayonotga ko‘ra, vertolyot Saudiya Arabistoni Milliy gvardiya vazirligi yurisdiksiyasidagi hududda texnik nosozlik sabab qulagan.
Biroq Yamandagi husiylar vertolyot raketa bilan urib tushirilganini da’vo qildi. Guruh yakshanba kuni Saudiya Arabistonining AH-6i vertolyotiga Najran yaqinida hujum qilingani aks etgan videoni e’lon qildi. Reuters agentligi videodagi holatni mustaqil ravishda tasdiqlay olmagan. Saudiya Arabistoni rasmiylari husiylarning da’vosiga hozircha izoh bermagan.
Husiylarning harbiy vakili Yahyo Sariy shanba kuni ham Najran yaqinida Saudiya Arabistonining Apache vertolyoti urib tushirilganini bildirgan edi. Bu bayonot ayni hodisaga tegishli yoki yo‘qligi noma’lum.
Koalitsiya vakili Turki al-Malikiy esa husiylarning da’vosiga javoban Apache vertolyotlari suratini e’lon qilib, ulardan biri tez orada jang maydoniga qaytishini ta’kidladi.
So‘nggi haftalarda Najranda Eron bilan ittifoqchi bo‘lgan husiylarning hujumlari kuchaygan. Saudiya Arabistoni boshchiligidagi koalitsiya va husiylar o‘rtasidagi to‘qnashuvlar Yamandagi mojaroning yanada keskinlashishiga sabab bo‘lmoqda.
