28 million so‘mlik giyohvand modda: ikki fuqaro ushlandi
Gumonlanuvchilardan birining xonadonidan ham giyohvand moddalar topilgan.
Navoiy viloyatida 350 gramm marixuanani 28 million so‘mga sotayotgan ikki nafar fuqaro qo‘lga olindi. Ulardan birining uyidan qo‘shimcha ravishda 1,2 kilogramm marixuana va sakkiz tup kannabis o‘simligi topildi.
Ma’lum qilinishicha, Navoiy viloyati IIB tezkor-qidiruv xizmati xodimlari o‘tkazgan tadbirda Samarqand viloyati Qo‘shrabot tumanida yashovchi ikki fuqaro 350 gramm marixuanani xaridorga sotayotgan vaqtida ashyoviy dalillar bilan ushlangan.
Tezkor tadbir davomida gumonlanuvchilardan birining yashash xonadoni tekshirilgan. Natijada og‘ilxonadan 1 kilogramm 200 gramm marixuana va sakkiz tup kannabis o‘simligi aniqlangan.
Shu tariqa, jami 1 kilogramm 550 gramm marixuana va sakkiz tup kannabis o‘simligi ashyoviy dalil sifatida olingan.
Holat yuzasidan Jinoyat kodeksining 273-moddasi 6-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
