Ta’lim va ilm-fan vazirligi: o‘rinbosarlar tayinlandi

Prezidentning tegishli qaroriga muvofiq, Ta’lim va ilm-fan vazirligida yangi tayinlovlar amalga oshirildi. Oybek Yo‘ldoshev vazirning birinchi o‘rinbosari, Mehriniso Pardayeva va Sanjar Mirzaliyev esa vazir o‘rinbosarlari etib tayinlandi.

 

Oybek Yo‘ldoshev 2018-yildan buyon “PwC Uzbekistan” kompaniyasida davlat sektori, infratuzilma va ESG bo‘yicha konsalting amaliyoti direktori lavozimida ishlab kelayotgan edi.

 

U professional faoliyatini 1998-yilda “Koskom” kompaniyasida boshlagan. 2003-yilda Buyuk Britaniyadagi Lids universiteti Biznes maktabida iqtisodiyot yo‘nalishi bo‘yicha magistraturani tamomlagan va Toshkentdagi Vestminster universitetida o‘qituvchi bo‘lib ishlagan. 2012-yilda Milanda iqtisodiyot bo‘yicha doktorlik dissertatsiyasini himoya qilgan.

 

Mehriniso Pardayeva tayinlovga qadar, 2021-yildan buyon Ta’limni rivojlantirish respublika ilmiy-metodik markazida boshqarma boshlig‘i sifatida faoliyat yuritgan. U pedagogika fanlari bo‘yicha falsafa doktori (PhD). Pardayeva 2011-yilda “O‘zbekiston Respublikasi mustaqilligining 20 yilligi” hamda 2012-yilda “Xalq ta’limi a’lochisi” ko‘krak nishonlari bilan taqdirlangan.

 

Sanjar Mirzaliyev esa 2026-yil may oyidan buyon Belarus–O‘zbekiston qo‘shma tarmoqlararo amaliy texnik kvalifikatsiyalar institutining ijrochi direktori lavozimida ishlab kelgan.

 

U Toshkent shahridagi Turin politexnika universitetining bakalavriat va doktorantura (PhD) bosqichlarini tamomlagan. 2020-yil martidan 2022-yil sentyabrigacha Toshkent davlat iqtisodiyot universitetining ilmiy tadqiqotlar, innovatsiyalar va doktorantura bo‘limi boshlig‘i lavozimida faoliyat yuritgan.