Тошкентда ташландиқ жойдан боғ барпо қилган фуқаро 82 млн сўм жаримага тортилди

 

Яшанабод туманидаги Арсен Аванесян икки йилдан ортиқ вақт давомида ташландиқ ер ўрнида бунёд этган яшил ҳудуд учун 82,4 миллион сўм жаримага тортилди. Унга ҳудудни аввалги ташландиқ ҳолатига келтириб қўйиш буюрилди.

 

Маълум бўлишича, ҳудуд темир йўл ёқасида ташландиқ ва қаровсиз бўш ер бўлган. У ўз ҳисобидан тозалаш, кўкаламзорлаштириш ва аҳоли учун дам олиш масканига айлантиришни мақсад қилган.

 

У кўкаламзорлаштириш ҳаракатларини 2022 йилда бошлаган. Аванесяннинг айтишича, минглаб дарахт ва кўчат эккан, йўлкалар қурган, ҳордиқ чиқариш учун ўриндиқлар, ёритиш тизими, видеокузатув ва суғориш коммуникацияларини ўрнатган.

 

Ўрта ҳисобда 1500 дан ортиқ кўчат экилиб, уларнинг ярми сув таъминоти муаммолари сабаб қуриб қолган. Шу билан бирга, 300 га яқин қўшни ва маҳалла аҳолиси ҳудудни обод қилиш ишларида ихтиёрий иштирок этган. Йиллар давомида бу ишларга умумий 1 млрд сўмдан ортиқ маблағ ҳам сарфланган.

 

Аванесян ишларни бошлашдан аввал маҳалла қўмитаси билан келишилганини айтади: «Қўшнилар билан йиғилиб гаплашдик, улар қўллаб-қувватлади. Ҳокимият ҳам хабардор эди», — дейди у.

 

Бироқ масъул идоралар бу фаолиятни ер қонунчилигини бузиш деб баҳолади. Текширувдан сўнг ташаббускорга 82,4 млн сўм жарима қўлланди ва ҳудудни "аввалги ҳолати"га — яъни, бўш ва қаровсиз ер кўринишига қайтариш талаб қилинди.

 

Ҳозирча бирор давлат органи юзага келган вазият бўйича расмий изоҳ бермаган.