Афғонистон: “Толибон” яна иккита шаҳарни эгаллади
“Толибон” ҳаракати Афғонистон шимолидаги Қундуз ва Толиқон шаҳарларини ҳам эгаллаганини маълум қилди.
Бу ҳақда ҳаракат вакили Қори Саид Хостий хабар берди.
Ижтимоий тармоқларда Толиқон марказида “Толибон” байроғи ўрнатилган расмлар тарқалди. Афғонистон оммавий ахборот воситалари маълумотларига кўра, ҳукумат кучлари Қундуз аэропортини ўз қўлида сақлаб турибди, аммо шаҳарнинг қолган барча муҳим объектлари жангарилар қўлига ўтган. Шунингдек, Сари-Пул шаҳри ҳам “Толибон” томонидан эгаллангани маълум қилинди.
Мамлакат шимолида вазият кескинлашгани муносабати билан бугун Афғонистон ўзбеклари етакчиси Маршал Абдулрашид Дўстум мудофаа вазири Бисмиллохон Муҳаммадий билан учрашди. Унда Афғонистон шимоли ва шимоли-шарқидаги вилоятларда Қобул ҳокимиятини тиклаш масаласи муҳокама қилинди.
“Толибон” Ҳиротга ҳужумни давом этирмоқда. Вилоят губернатори матбуот котиби Фарҳод Жилонийнинг маълум қилишича, сўнгги бир кун давомида 12 жангари Ҳирот остонасида йўқ қилинган. Шаҳарда ҳукумат кучлари ва маҳаллий қуролли гуруҳлар “Толибон”га қарши курашмоқда.
Афғонистон Мудофаа вазирлиги 8 август куни жами 572 жангари йўқ қилинганини маълум қилди. Жумладан, Лашкаргоҳда “Толибон” қўмондонларидан бири Мавлави Ҳижрат ва “Ал Қоида”нинг уч нафар покистонлик аъзоси ҳалок бўлган.
Бундан аввал АҚШнинг B-52 самолётлари жангариларга авиазарбалар берганини хабар қилинган эди.
