Андижонда фуқаро 40 млн сўм пора билан қўлга тушди
У танишлари орқали боғ ҳудудига трансформатор ўрнатиб бермоқчи бўлган.
Иқтисодий жиноятларга қарши курашиш департаментининг хабарига кўра, Бош прокуратура ҳузуридаги Департамент ҳамда ДХХнинг Асака тумани бўлимлари томонидан тезкор тадбир ўтказилган.
Унда фуқаро С.М. “Х.Ш.” фермер хўжалиги иш юритувчиси Б.нинг ишончига кириб, “Ўзэнергоинспекция” бўлимида ишловчи танишлари орқали хўжаликка қарашли боғ ҳудудига қуввати 100 КВА бўлган трансформатор ўрнатиб бериш эвазига 40 млн сўмни олган вақтида ушланган.
Унинг кўрсатувига асосан давом этган тадбирда, “Ўзэнергоинспекция”нинг Андижон ҳудудий бўлими етакчи мутахассиси Ф.С. боғ ҳудудига трансформаторни улаш, ҳужжатларни расмийлаштириш ва рухсат олиб бериш эвазига 5 млн сўмни олган вақтида ашёвий далиллар билан қўлга тушди.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
