Андижонда пора олган орган ходимлари қамалди

Аввалроқ Асака тумани ИИБ тергов бўлинмасининг собиқ ходими ва прокурор ўринбосари қурилиш фирмаси раҳбарига нисбатан қўлланилган қамоқ эҳтиёт чорасини ўзгартириб, аниқланган зарар суммасини камайтириб бериш эвазига 15 минг АҚШ долларини олган вақтида ушлангани хабар қилинганди.

 

Мазкур жиноят иши юзасидан жорий йилнинг 26 июнь куни Андижон вилояти жиноят ишлари бўйича Избоскан туман судида судланувчилар Х.А. ва С.Х.га оид жиноят иши кўриб чиқилди.

 

Суд ҳукмига кўра, судланувчи С.Х. ЖКнинг 25,168-моддаси 4-қисми “а” банди ва 28,211-моддаси 3-қисми “а” бандида назарда тутилган жиноятларни содир этганликда айбли деб топилди.

 

Судланувчи С.Х.га нисбатан ЖКнинг 59,61-моддалари тартибида жазоларни қисман қўшиш йўли билан ўташ учун узил-кесил 2 йил муддатга ҳуқуқни муҳофаза қилувчи органларда ишлаш ҳуқуқидан ва 8 йил 6 ой муддатга озодликдан маҳрум қилиш жазолари тайинланди.

 

Судланувчи Х.А. ЖКнинг 25,168-моддаси 4-қисмининг “а” банди ва 28,211-моддаси 3-қисмининг “а” бандида назарда тутилган жиноятларни содир этганликда айбли деб топилди.

 

Унга нисбатан ЖКнинг 59,61-моддалари тартибида жазоларни қисман қўшиш йўли билан ўташ учун узил-кесил 2 йил муддатга ҳуқуқни муҳофаза қилувчи органларда ишлаш ҳуқуқидан ва 6 йил 1 ой муддатга озодликдан маҳрум қилиш жазолари тайинланди.