Birlashgan Arab Amirliklari dunyoda birinchi bo‘lib qonunlar loyihasini tayyorlashda sunʼiy intellektdan (AI) foydalanishni boshladi. Hukumat maʼlumotlariga ko‘ra, yangi tizim qonun ijodkorligi jarayonini 70 foizgacha tezlashtirishi mumkin.
Bu tashabbus mamlakatda raqamli transformatsiya va innovatsiyani qo‘llab-quvvatlashga qaratilgan keng ko‘lamli strategiyaning bir qismi sanaladi. Yangi AI asosidagi platforma qonunlarni tahlil qiladi, amaldagi hujjatlar bilan taqqoslaydi va yangi normalarni taklif etadi.
Amirliklar rasmiylari taʼkidlashicha, sunʼiy intellekt faqat yordamchi vosita bo‘lib, qabul qilinadigan qarorlar baribir inson huquqshunoslari va siyosatchilar tomonidan qayta ko‘rib chiqiladi va tasdiqlanadi. Bu esa huquqiy aniqlikni saqlab, samaradorlikni oshirishga xizmat qiladi.