Эрон президенти можарони тугатиш учун АҚШ ва Исроилдан товон пули талаб қилди
Шунингдек, Эроннинг қонуний ҳуқуқлари тан олиниши ва халқаро хавфсизлик кафолатлари берилиши керак.
Масъуд Пезешкиан можарони тугатиш учун АҚШ ва Исроилдан товон пули тўлаш ҳамда келажакдаги ҳарбий тажовузларнинг олдини олиш бўйича қатъий халқаро кафолатлар берилишини талаб қилди.
Эрон президенти бу талабларни можаронинг якунланиши учун “ягона йўл” деб атади.
Пезешкиан ижтимоий тармоқлардаги саҳифасида Россия ва Покистон раҳбарлари билан ўтказган суҳбатлари давомида ҳам Теҳроннинг минтақада тинчликни қўллаб-қувватлаш позициясини яна бир бор тасдиқлаганини маълум қилган.
Президентнинг фикрича, Исроил ва АҚШ томонидан бошланган ҳарбий тўқнашувни якунлаш учун қуйидаги шартлар бажарилиши керак:
Эроннинг қонуний ҳуқуқларини тан олиш;
мамлакатга етказилган зарар учун товон пули тўлаш;
келажакда ҳарбий тажовузларнинг олдини олиш бўйича халқаро кафолатлар бериш.
Шунингдек, Теҳрон Вашингтондан Эроннинг ядровий энергетика соҳасидаги ҳуқуқларини тан олишни, жумладан, мамлакат ҳудудидаги ядровий объектларда тўлиқ ядровий ёқилғи циклини амалга ошириш имкониятини тасдиқлашни ҳам талаб қилмоқда.
