Эрдўғон Яқин Шарқдаги урушни тўхтатишга чақирди
Туркия президентининг таъкидлашича, Эрондаги можаронинг кучайиши бутун минтақада вазиятнинг кескинлашишига олиб келиши мумкин.
Ражаб Таййиб Эрдўғон минтақада кескинлашиб бораётган вазият фонида АҚШ–Исроил ва Эрон ўртасидаги ҳарбий қарама-қаршилик кенг кўламли урушга айланишидан олдин уни тўхтатишга чақирди.
Президент Анқарада партиясининг парламент гуруҳи йиғилишида сўзга чиқиб, дипломатик йўл билан можаронинг олдини олиш “тўлиқ мумкин” эканини таъкидлаган. Унинг айтишича, Туркия вазиятни барқарорлаштириш мақсадида музокараларни қайта тиклаш ва дипломатик жараённи фаоллаштириш бўйича саъй-ҳаракатларни давом эттирмоқда.
Давлат раҳбари минтақадаги вазият ниҳоятда нозик эканини қайд этиб, Туркия ушбу шароитда эҳтиёткорона сиёсат юритаётганини ҳамда эҳтимолий хавфлардан ҳимояланиш учун зарур чораларни кўраётганини билдирган.
Шунингдек, у Туркия минтақадаги инқирозларга бефарқ эмаслигини ва оғир вазиятларда дўст ҳамда қардош давлатларни қўллаб-қувватлашда давом этишини таъкидлаган.
Президентнинг сўзларига кўра, Анқара минтақада юзага келиши мумкин бўлган мазҳаблараро низолар ва кескинликларни кучайтиришга қаратилган уринишларга қарши қатъий чоралар кўрмоқда. Нутқи давомида Эрдўғон мусулмон дунёсида бирлик зарурлигини таъкидлаб, динни мазҳаб ёки этник келиб чиқиш асосида ажратишга қарши эканини билдирган.
