Bog‘chalarda uzaytirilgan qishki taʼtil kunlari uchun to‘lov undirilmaydi. Bu haqda Maktabgacha taʼlim vazirligi maʼlum qildi.
Anomal sovuq sababli O‘zbekistondagi bog‘chalarda navbatdan tashqari taʼtil eʼlon qilingunga qadar to‘lovlar to‘langan bo‘lsa, unda keyingi to‘lovlarni amalga oshirish jarayonida taʼtil kunlari uchun to‘langan badal summasi hisobga olinadi.
Bunda bolaning kelmagan kunlari soni bir kunlik to‘lov miqdoriga ko‘paytirilib, keyingi oyning to‘lov summasidan ayrilib tashlanadi.
Shuningdek, kelmagan kunlar uchun to‘lov hali amalga oshirilmagan bo‘lsa, to‘lanishi lozim bo‘lgan joriy to‘lov miqdori bola kelmagan kunlari hisobidan kamaytiriladi.
Eslatib o‘tamiz, avvalroq maktabgacha taʼlim tashkilotlari uchun taʼtil kunlari 23-yanvarga qadar uzaytirilgandi.