Бразилияда иқлим саммити учун ўрмонлар кесилмоқда
Бу эса экологларнинг кескин норозилигига сабаб бўлди.
Бразилия шу йилнинг ноябрь ойида COP30 иқлим саммитига мезбонлик қилади. Аммо тадбирга тайёргарлик кўриш жараёнида расмийлар Амазон ўрмонларининг муҳофазаланган ҳудудларини кесиб ташлаш билан шуғулланмоқда. Белем шаҳрига йўл қуриш учун минглаб дарахтлар йўқ қилинмоқда, бу эса экологларнинг кескин норозилигига сабаб бўлди.
Маҳаллий аҳоли ва табиат ҳимоячилари ҳукуматни танқид қилмоқда. Улар йўл қурилиши кейинчалик янада кўпроқ ўрмонларнинг кесилишига олиб келиши ва бу Амазон экотизимига жиддий зарар етказишини айтишмоқда. Йўл яқинида яшовчи баъзи одамлар ўз даромад манбаларидан маҳрум бўлишгани ва ҳеч қандай товон пули олмаганликларини билдиришмоқда.
Бразилия ҳукумати эса янги йўл бўйлаб дарахтлар экилиши ва ҳайвонлар учун махсус ўтиш жойлари ташкил этилишини ваъда бермоқда. Президент Лула да Силва саммит Амазон ўрмонларини ҳимоя қилиш масалаларига бағишланишини таъкидлаган. Шунга қарамай, атроф-муҳит ҳимоячилари иқлим муҳокамаси учун ўрмонларни йўқ қилиш нотўғри қарор эканлигини эслатмоқда.
