“O‘zbekneftgaz” rahbari Bahodirjon Sidiqov AJ dizel yonilg‘isi narxini 15 foizga pasaytirmoqchi ekanini maʼlum qildi.
Bu bo‘yicha 1- fevral kuni prezident raisligida o‘tgan videoselektr yig‘ilishida topshiriq berilgan.
Bahodirjon Sidiqov “O‘zbekneftgaz” oldida 2024 yilda 680 ming tonna dizelni arzonlashtirilgan narxda fermer xo‘jaliklariga yetkazib berish vazifasi turganini taʼkidladi. Uning aytishicha, “O‘zbekneftgaz” tomonidan ushbu vazifa ijrosi taʼminlanadi.
"Biz 2024 yilda 2023 yilga nisbatan qo‘shimcha 200 ming tonna dizel yonilg‘isini ishlab chiqarishni rejalashtirganmiz. Dizel yetkazib berish bo‘yicha miqdor jihatidan hech qanday masala bo‘lmaydi. Yana bir topshiriq dizel yonilg‘isini arzonlashtirilgan narxda yetkazib berish bo‘yicha bo‘ldi. Biz bir hafta davomida barcha hisob-kitoblarimizni yakunlab, dizel yonilg‘isining birjaga qo‘yiladigan narxlarini 15 foizga kamaytirish bo‘yicha barcha choralarni ko‘ryapmiz", — dedi Sidiqov.
Qayd etilishicha, ushbu dizelning sifatli bo‘lishini, o‘z vaqtida yetkazib berilishini taʼminlash uchun yangicha tartib o‘rnatiladi. Yangicha tartib orqali hududlar kesimida “O‘zbekneftgaz”ning markaziy apparati va neft bazalari, bundan tashqari, fermerlarga xizmat ko‘rsatuvchi yonilg‘i quyish shoxobchalaridagi masʼullarning alohida vazifalari belgilab beriladi.