«Энди «сояда» ишлаш вақти ўтди» — депутат
Олий Мажлис Қонунчилик палатаси депутати Жамшид Қосимов тадбиркорларнинг тинкасини қуритган ноқонуний текширувларга барҳам берилгани ҳақида гапирди.
Ўтган бир йилда кичик тадбиркорлар сони 40 мингтага кўпайиб, 490 мингга, ўрта тадбиркорлар сони 2 мингтага ошган. Олий Мажлис Қонунчилик палатаси депутати Жамшид Қосимовнинг маълум қилишича, йирик корхоналар сони эса бир йилда 400 тага кўпайиб, 1,5 мингта бўлди. Энг асосийси, тадбиркорларнинг тинкасини қуритган ноқонуний текширувларга барҳам берилди.
Президентнинг тадбиркорлар билан учрашувида ҳам жорий йилнинг олти ойида текширишлар ўтган йилнинг мос даврига нисбатан 40 фоиз камайгани, бунинг натижасида тадбиркорларимиз тўғри ишлаш “сояда” ишлашдан кўра афзал эканини тушуниб етаётгани тилга олинди. Текшириш тартибини бузган назорат органларининг 918 нафар мансабдор шахслари маъмурий жавобгарликка тортилди. 69 нафарига интизомий жазо чоралари қўлланилди.
