TikTok taqiqidan hafsalasi pir bo‘lganlar uchun endi “RedNote” ilovasi boshpanaga aylanmoqda. U amerikalik foydalanuvchilar orasida juda tez mashhurlikka erishib, atigi ikki kunda 700 ming yangi obunachiga ega bo‘ldi.
Ilova orqali amerikaliklar xitoylik foydalanuvchilar bilan real vaqt rejimida muloqot qilishlari mumkin.
“Xiaohongshu” ilovasi Xitoydagi eng mashhur platformalardan biri va u ko‘pincha “RedNote” deb ham ataladi. Bu ilova Instagram va Pinterestʼning o‘ziga xos jamlanmasi bo‘lib, unda foydalanuvchilar o‘zlarini qiziqtirgan mavzularda fotosuratlar va videolar joylab borishlari mumkin.
Xitoyda maʼlumotlar maxfiyligi saqlanishi va kuzatuv bilan bog‘liq xavotirlar borligiga qaramay, ko‘plab foydalanuvchilar bu holatga befarq qarashmoqda.
RedNoteʼdagi foydalanuvchilar kuzatuvchilari bilan yengil hazillar, memlar va shaxsiy hikoyalarini bo‘lishishmoqda. Amerikalik va xitoylik foydalanuvchilarning bu kutilmagan do‘stligi ikki davlat o‘rtasidagi siyosiy qarama-qarshilikdan tubdan farq qiladi.