"Эрон битта ядровий бомба устида тўхтаб қолмайди"
Исроил Эрон бешта ядровий бомба ярата олади, деб ҳисоблайди.
Эрон томонидан тўпланган уран миқдори бешта ядровий бомба учун етарли. Бу ҳақда Исроил мудофаа вазири Ёав Галант маълум қилди.
"Хато қилманг — Эрон битта ядровий бомба устида тўхтаб қолмайди. Энди Эрон 20 % ва 60 % гача бойитилган материал олди, бу бешта ядровий бомба учун етарли", — деди Галант грециялик ҳамкасби билан Афинага ташрифи чоғида.
Унинг таъкидлашича, уранни 90 фоизгача бойитиш Эрон томонидан "жиддий хато" бўлади.
Тахминларга кўра, Эрон ҳалигача уранни ядровий қурол учун зарур бўлган 90% софлик даражасида бойитгани йўқ, аммо агар хоҳласа, буни тезда амалга ошириши мумкин.
Эслатиб ўтамиз, АҚШ Эрон бир неча ой ичида ядро қуролини яратиши мумкинлигини айтган эди. Қўшма Штатлар Теҳрон ядровий бомба яратишга қарор қилса, нима қилиш кераклиги ҳақида бир нечта вариантни ишлаб чиққан.
