Maʼlum bo‘lishicha, paxta yig‘im-terimida majburiy mehnat hamda mehnat huquqlari buzilishiga oid jami 128 ta murojaat kelib tushgan. Ularning 54 tasi “call – markaz”, 15 tasi “web sayt”, 24 tasi ijtimoiy tarmoqlar orqali, 35 tasi esa yozma murojaatdan iborat. Shuningdek, mehnat qonunchiligini buzganligi uchun 65 nafar mansabdorga jami 198 mln. 450 ming so‘m miqdorda maʼmuriy jarima tayinlangan.
Bundan tashqari, 21 ta holatda mehnat shartnomasi tuzilmagani, 25 ta holatda mehnat sharoitlari yaratilmagani, 14 ta holatda terim pullarining o‘z vaqtida to‘lamaslik faktlari aniqlanib, mansabdor shaxslar maʼmuriy javobgarlikka tortilgan.
Maʼlumot uchun: O‘zbekiston Respublikasi Konstitutsiyasining 37-moddasiga ko‘ra, qonunda ko‘rsatilgan hollardan tashqari majburiy mehnat taqiqlanadi. Mehnat Kodeksining 7-moddasida ham shunday qoida belgilanib, unga majburiy mehnatga biron jazoni qo‘llash bilan tahdid qilish orqali ish bajarishga majburlash, deya taʼrif berilgan.
Eslatib o‘tamiz, bundan avval o‘qituvchilar maktabda o‘z xohishi bilan bodom tergani hamda Sirdaryoda o‘qituvchilarni majburan ishlatgan maktab direktori jarimaga tortilgani haqida xabar berilgandi.
Cho‘lponoy Ahmedova