Ғазода эркакларнинг умр кўриш давомийлиги 38 йилга қисқарди
Бунга Исроил ҳужумлари сабаб бўлгани айтилмоқда.
Илмий тадқиқот натижаларига кўра, 2023 йил 7 октябрдан кейин Исроил томонидан Ғазо секторига берилган зарбалар натижасида маҳаллий аҳолининг ўртача умр кўриш давомийлиги кескин камайган.
Халқаро тадқиқотчилар гуруҳи 7 октябрдан кейинги ўзгаришларни таҳлил қилди. Маълумотлар тўлиқ эмас, чунки бомбардимонлар оқибатида баъзи жасадларни аниқлаш ёки топиш қийин бўлган. Шу сабабли, маҳаллий Соғлиқни сақлаш вазирлиги икки хил ҳисобот берди.
Фақат шахси аниқланган жасадлар асосида ўртача умр давомийлиги 44,4 йилга тушди, яъни 30 йиллик пасайиш кузатилди. Бедарак йўқолганларни ҳам ҳисобга олганда, бу кўрсаткич 36,1 йилгача тушди, бу эса 40 йилга қисқариш деганидир.
Жумладан, эркаклар учун умр давомийлиги 38 йилга қисқариб, 73,6 йилдан 35,6 йилга тушди, аёллар учун эса бу кўрсаткич 29,9 йилга пасайди.
Тадқиқотда қайд этилишича, 2023 йил октябрь 2025 йил январь оралиғида Ғазо секторида 45 936 нафар одам ҳалок бўлган, яна 10 мингдан ортиғи бедарак йўқолган. Бироқ олимлар фақат 41 615 ўлим ҳолатини таҳлилга киритган, чунки тадқиқот 2024 йил сентябргача бўлган давр билан чекланган.
Комила Одилова тайёрлади
