Германияда чумолилар алоқа узилишини келтириб чиқармоқда
Улар электр ва интернет симларини кемириб ташламоқда.
Германия жанубида яшовчилар Ўртаер денгизи чумолилари босқинидан азият чекишмоқда. Чунки ҳашаротлар ҳатто симларни ҳам кемириб ташламоқда.
Маълумотларга кўра, немисларга Tapinoma magnum деб номланувчи чумолилар ҳужум қилмоқда. 2-3 мм катталикдаги чумолилар Германия жанубига Швейцария орқали Ўртаер денгизи мамлакатларидан ўтиб келган.
Улар биринчи бўлиб чегара бўйидаги Лёррах шаҳрига кириб келган, кейин Кел, Гейделберг, Карлсруэ, энди эса навбат Штутгартга ўтган. Ҳашаротлар электр ва интернет симларини кемириб, электр таъминотида ва алоқада узилишларни келтириб чиқармоқда.
Экспертларга кўра, бу чумолилар касалликлар ташувчиси ҳисобланмайди. Бироқ айрим кишиларда қисқа муддатли аллергия ва руҳий стрессга сабаб бўлиши мумкин.
