Грузияда ҳибсга олинган Саакашвили очлик эълон қилди
Ватанига қайтганидан сўнг ҳибсга олинган Грузия собиқ президенти Михаил Саакашвили очлик эълон қилди. У Украина консули билан учрашишни талаб қилмоқда. Бу ҳақда Грузия омбудсмани Нино Ломжария собиқ президент билан учрашувдан кейин маълум қилди.
“Мен кирганимда, у (Саакашвили) шифокор олдида эди ва тиббий кўрикдан ўтаётганди. Кейин бизга камерада мулоқот қилиш имконияти берилди. Михаил Саакашвили очлик эълон қилишини айтди”, — деган Ломжария.
У Саакашвили ўзини сиёсий маҳбус деб ҳисоблаётганини қўшимча қилган.
Эслатиб ўтамиз, Грузия собиқ президенти Михаил Саакашвили кеча, 1 октябрь куни ватанига қайтганида ҳибсга олинди.
Маълумот учун, Михаил Саакашвили 2004-2013 йилларда Грузия президенти бўлган. Президентлик муддати тугашига оз вақт қолганида у мамлакатни тарк этган. Шундан сўнг, унга нисбатан тўртта жиноий иш очилган, улардан иккитаси бўйича 2018 йилда суд ҳукми чиқарилган. Ҳукмга кўра, Тбилиси шаҳар суди Саакашвилини 2006 йилда Грузия Бирлашган банки ходими Сандро Гиргвлиани ўлимида сиртдан уч йилга ва ўша йилнинг июнь ойида 2005 йилда депутат Валерий Гелашвилининг калтакланиши иши бўйича олти йилга озодликдан маҳрум қилган эди.
Бундан аввалроқ Грузия собиқ президенти Михаил Саакашвили қайтгани эълон қилганди.
Чўлпоной Аҳмедова
