Ҳуқуқшунослик фанидан тестлар бўйича эътирозлар тўхтамаяпти
Билимларни баҳолаш агентлиги иккинчи бор муносабат билдирди.
Аввалроқ ОТМларга кириш тест синовларида ҳуқуқшунослик фанларидан дарсликда йўқ маълумотлардан, хусусан, қонун ва кодекслардан саволлар тузилгани ҳақида хабарлар тарқалиб, БМБ бунга расмий муносабат билдирганди.
Шундан кейин ҳам ижтимоий тармоқда тест саволлари бўйича эътирозлар тўхтамаяпти. Хусусан, Расул Кушербаев ҳам бунга муносабат билдириб, агентликни судга бериш кераклигини ёзди.
Агантликка кўра, ҳуқуқшунослик фанлари тез ўзгарувчи Ижтимоий фан эканлиги, қонун ҳужжатлари янгиланиши билан дарсликдаги маълумотлар эскириши, амалдаги қонун ҳужжатлари билан ҳар бир фуқаро мунтазам танишиб боришини инобатга олиш лозим.
Қонун ҳужжатлари янги таҳрирда қабул қилинсада, ўқув дастуридаги мавзулар ўзгармай қолаверади. Юқоридагиларни инобатга олиб, ҳуқуқшунослик фанлари бўйича тест синови материаллари амалдаги меъёрий-ҳуқуқий ҳужжатлар асосида шакллантирилган ва тест топшириқларининг маъно-мазмуни ҳуқуқшунослик фанлари ўқув дастурига мослаштирилган.
Абитуриентлар олий таълим муассасаларининг бакалавриат таълим йўналишларига кириш тест синовларига тайёргарлик кўришлари учун ўқишга тавсия этилган дарсликлар ва ўқув адабиётлари рўйхати ҳам агентлик сайтида жойлаштирилган бўлиб, ҳуқуқшунослик фанлари бўйича тест топшириқлари норматив-ҳуқуқий ҳужжатларга киритилган ўзгартириш ва қўшимчаларни инобатга олган ҳолда шакллантирилиши, қонун ҳужжатларига белгиланган тартибда ўзгартириш киритилганда қонуннинг асл манбайи (Ўзбекистон Республикаси қонунчилик маълумотлари миллий базаси – lex.uz. сайти)га мурожаат қилиниши бўйича ҳам маълумотлар эълон қилинган.
