Жиззахда иккита машина аварияга учради
Оқибатда ҳайдовчилардан бири реанимацияга ётқизилган.
Жиззах вилоятининг Шароф Рашидов туманида 13 июль куни иккита автомашина иштирокида йўл-транспорт ҳодисаси юз берди. Ҳолатга вилоят ИИБ ЙҲХБ ахборот хизмати муносабат билдирди.
Ҳодиса Шароф Рашидов тумани Бўстон МФЙ ҳудудидан ўтган йўлда содир бўлган. 2000 йилда туғилган ҳайдовчи Nexia-1 русумли автомашинасини Жиззах — Зафаробод йўналиши бўйлаб бошқариб кетаётган вақтида қувиб ўтиш қоидасига амал қилмаган. Оқибатда ўзига нисбатан қарама-қарши йўналишда ҳаракатланиб келаётган Damas русумли автомашинанинг йўналишига чиқиб кетиб, йўл-транспорт ҳодисаси содир этган.
ЙТҲ оқибатида Damas ҳайдовчиси олган тан жароҳатлари билан РШТЁИМ Жиззах филиалининг жонлантириш бўлимига ётқизилган. Ҳозирда Шароф Рашидов тумани ИИБ тергов бўлими томонидан суриштирув ишлари олиб борилмоқда.
