2023/2024-o‘quv yilidan boshlab Samarqand davlat tibbiyot universitetining Jizzax filiali tashkil etiladi. Bu haqda «O‘zA» axborot agentligi xabar bermoqda.
SamDTU Jizzax filialining asosiy vazifalari hududda malakali tibbiyot kadrlarini tayyorlash, xorijiy oliy taʼlim muassasalarining ilg‘or tajribasini tatbiq etish asosida malaka talablari, o‘quv rejalari va fan dasturlarini ishlab chiqish kabilardan iborat.
Shuningdek, fundamental, amaliy va innovatsion ilmiy-tadqiqot ishlari tibbiyot amaliyotidagi mavjud muammolar yechimiga qaratilib, tibbiy taʼlim, fan, innovatsiya va ilmiy tadqiqotlar natijalarining uzviy bog‘liqligi yo‘lga qo‘yiladi.
Xorijiy tibbiyot oliy taʼlim muassasalari bilan hamkorlik doirasida talabalar, professor-o‘qituvchilar va ilmiy izlanuvchilar akademik mobilligi dasturlari hamda qo‘shma taʼlim dasturlarini joriy etish va rivojlantirish asosiy vazifalardan hisoblanadi.
Respublika va xorijiy oliy taʼlim muassasalari, ilmiy markazlarga iqtidorli yosh bitiruvchilarni magistratura, doktoranturaga muntazam yuborish orqali filialda ilmiy-pedagogik kadrlar salohiyatini oshirib borish ham ko‘zda tutilgan.
SamDTU Jizzax filialining mintaqa va xalqaro miqyosdagi nufuzini oshirish maqsadida xorijiy fuqarolar uchun taʼlim olish imkoniyatini kengaytirish va ilg‘or xalqaro tajribalarni tatbiq etish ham rejalashtirilgan.
Bundan tashqari, 2023-2024 o‘quv yilidan Jizzax davlat pedagogika universitetining “Davolash ishi” va “Pediatriya ishi” bakalavriat taʼlim yo‘nalishida tahsil olayotgan talabalarga o‘qishini SamDTUning Jizzax filialida davom ettirishlariga ruxsat beriladi.
Eslatib o‘tamiz, ayni paytda viloyatda Jizzax davlat pedagogika universiteti, politexnika instituti, Sambharm universiteti, O‘zbekiston Milliy hamda Qozon Federal universitetlarining Jizzax filiallari faoliyat olib bormoqda.