КХДР ядро қуролини ишга туширишга тайёрлигини эълон қилди
Ким Чен Ин армияга ядро кучларини ҳар доим жанговар ҳолатда сақлашни буюрди.
26 февраль куни Шимолий Корея стратегик қанотли ракеталарини синовдан ўтказди, тадбирда Ким Чен Ин ҳам қатнашди. У армияга ядро кучларининг жанговар тайёргарлигини ошириш ва уларни қўллашга тўлиқ тайёр бўлишни буюрди.
Синовлар 26 февраль куни эрталаб ўтказилган. Ракета 1587 км масофани 7,9 минг сонияда босиб ўтиб, белгиланган нишонга аниқ тегган. Бу синовларнинг асосий мақсади мамлакат хавфсизлигига таҳдид солаётган душманларга огоҳлантириш бериш ва турли ядро воситаларининг тайёрлигини кўрсатиш эканлигини таъкидлади.
Ким Чен Иннинг сўзларига кўра, кучли зарба бериш қобилияти энг мукаммал ҳимоя ва мудофаа ҳисобланади. У Шимолий Корея қуролли кучларининг асосий вазифаси ядро қуроли орқали мамлакат суверенитети ва хавфсизлигини таъминлаш эканлигини қайд этди.
Жанубий Корея ҳарбийлари 26 февраль куни Шимолий Корея томонидан ракета учиришга тайёргарлик белгиларини аниқлаган ва уларнинг парвозини кузатган. Маълумотларига кўра, Пхенян ядро каллакларини етказиб беришга мўлжалланган стратегик қанотли ракеталарни ишлаб чиқиш билан бир неча йилдан бери шуғулланмоқда.
2024 йил январь ойида Шимолий Корея ўрта ва узоқ масофага учувчи гипертовушли баллистик ракетасини синовдан ўтказган эди. Ким Чен Иннинг таъкидлашича, бу ракета исталган ракетага қарши мудофаа тизимини енгиб ўта олади. Пхенян 2021 йилдан буён гипертовушли қуролларни синовдан ўтказаётганини билдирсада, уларнинг учиш масофаси 1,5 минг км дан ошмаган.
