Лавозимидан озод этилган судьялар шахси биринчи марта очиқланди

 

Судьялар олий кенгаши раисининг матбуот котиби Турсунали Акбаровнинг маълум қилишича, сўнгги 40 кун ичида жами 48 нафар судья интизомий жавобгарликка тортилган. Шунингдек, 14 нафар судья вазифасидан озод этилган. Уларнинг 5 нафари ўз хоҳишига кўра, 9 нафари одил судловни ва судьялик қасамёдини бузгани учун ишдан олинган.

 

Судьялар Олий кенгаши расмий саҳифасида эълон қилинган маълумотларга кўра,  жорий йил 7 январь куни фаолиятида масъулиятсизликка ва процессуал қонун нормалари бузилишига йўл қўйгани учун қуйидаги шахслар интизомий жазога тортилган:

– Олий суд судьяси Фахриддин Халилов;
– Олий суд судьяси Санобар Мамадалиева;
– Фарғона вилоят суди раисининг ўринбосари – фуқаролик ишлари бўйича судлов ҳайъати раиси Ойбек Ҳасанов;
– Тошкент вилоят суди раисининг ўринбосари – жиноят ишлари бўйича судлов ҳайъати раиси Умиджон Расулбердиев;
– Фарғона вилояти фуқаролик ишлари бўйича Фарғона туманлараро судининг раиси Улуғбек Орипов.

 

 

14-15 февраль кунлари масъулиятсизлиги учун қуйидаги судьялар жавобгарликка тортилган:

– Хоразм вилояти жиноят ишлари бўйича Хонқа туман судининг раиси М. Ҳасанова;
– Навоий вилояти фуқаролик ишлари бўйича Кармана туманлараро судининг раиси Ш.Тогоев.

 

 

Бундан ташқари, 19 февралда Ўзбекистон Республикаси Судьялар олий кенгаши қарори билан: 

– Тошкент вилояти жиноят ишлари бўйича Зангиота туман судининг раиси Ўктам Холиқов;
– Тошкент вилоят судининг фуқаролик ишлари бўйича судьяси Хилола Бегалиева;
– Андижон вилояти жиноят ишлари бўйича Қўрғонтепа туман судининг раиси Исоқбой Эргашев;
– Бухоро вилояти Бухоро туманлараро маъмурий судининг судьяси Маъруф Саидовлар ўз аризаларига кўра, лавозимларидан озод этилиб, ваколатлари муддатидан илгари тугатилди.