Мексикада "Отис" тўфони қурбонлари сони 50 га яқинлашди
Тўфон Акапулко соҳилидаги курортлар яқинига етиб келганидан кейин яна 36 киши бедарак йўқолган.
Мексиканинг Герреро штатига ёпирилган "Отис" тўфони қурбонлари сони 48 кишига етди, яна 36 киши бедарак йўқолган. Бу ҳақда Герреро штати губернатори Эвелин Салгадо маълум қилди.
Мексика президенти Андрес Мануэл Лопес Обрадор ҳам қидирув-қутқарув ишлари узлуксиз давом этаётганини таъкидлади.
Давлат раҳбари табиий офат зонасига бориш ниятини билдирди.
Лопес Обрадор ҳукумат маҳаллий ҳокимият органлари билан яқин алоқада эканини таъкидлади.
Маълумот учун: Тинч океанида юзага келган "Отис" тўфони 25 октябрь куни Мексикага яқинлашди. У Мексиканинг жанубий қирғоқларига ёпирилган пайтда Саффир-Симпсон шкаласи бўйича бешинчи тоифага чиққан.
Тўфон туфайли ўн минглаб аҳоли уйларига зарар етган.
Тўфоннинг эҳтимолий оқибатларини бартараф этиш учун ҳудудга 17 минг ҳарбий ва полициячи сафарбар этилган.
