Метрополитеннинг икки бекат оралиғида поезд тўхтаб қолди
Воқеа метронинг “Чилонзор” йўналишида содир бўлган.
Бугун, 5 февраль куни Тошкент метрополитенининг "Чилонзор" йўналишида ҳаракатланаётган поезд “Халқлар дўстлиги” ва “Миллий боғ” бекатлари оралиғида техник носозлик сабаб тўхтаб қолган.
Расмийларнинг хабар беришича, мазкур воқеа соат 19.27да содир бўлган. Шу вақт машинист керакли чора-тадбир кўриб, ҳаракат таркибини “Миллий боғ” бекатига олиб келган ва йўловчиларни туширган. Ушбу поездга ёрдам кўрсатиш мақсадида кейинги навбатда ҳаракатланаётган поезд ҳам йўловчиларни “Миллий боғ” бекатида қолдириб, таъмир учун “Чилонзор” электрдепосига йўналтирилган.
“Техник носозлик сабаб юзага келган ноқулайликлар учун узр сўраймиз” – дейилган “Тошкент метрополитени" ДУК хабарида.
Аввалроқ “Космонавтлар” метро бекатида кучли ёнғин чиққани хақидаги хабар бўйича расмий изоҳ берилганди.
Жавоҳирбек ТУРСУНОВ
