Namangan viloyatining Uchqo‘rg‘on tumanida yuz bergan ayanchli yo‘l-transport hodisasi ikki nafar inson hayotiga zomin bo‘ldi. Voqea Spark rusumli avtomobil ishtirokida sodir bo‘lgan. Eng achinarlisi, rulda hali haydovchilik guvohnomasiga ega bo‘lmagan 16 yoshli qiz bo‘lgan.
Rasmiy ma’lumotlarga ko‘ra, avtomobil qizning otasiga tegishli bo‘lib, u boshqaruvni qiziga topshirgan. Mashina old o‘rindig‘ida otasi, orqa o‘rindiqda esa uning onasi va 10 yoshli singlisi bo‘lgan.
Qiz xavfli burilishda boshqaruvni yo‘qotgan va avtomobil yo‘l chetidagi Andijon kanaliga tushib ketgan. Hodisa oqibatida orqa o‘rindiqda bo‘lgan ayol va kichik yoshli qizaloq nafas yo'liga suv tiqilishi sababli hayotdan ko‘z yumgan.
Mashinani boshqargan voyaga yetmagan qiz va uning otasi turli tan jarohatlari bilan kasalxonaga yotqizilgan.
Mazkur holat yuzasidan tergovga qadar tekshiruv ishlari olib borilmoqda.