Оҳангаронда қора тутун сабаб 6 та машина ЙТҲга учради
ЙҲХБ ҳодиса тафсилотларини очиқлади.
Бугун, 23 июнь куни Тошкент вилоятининг Оҳангарон туманида олтита машина иштирокида йўл-транспорт ҳодисаси содир бўлди. Ҳолат юзасидан вилоят ИИББ ЙҲХБ маълумот берди.
Қайд этилишича, ҳодиса соат 13:00 ларда Оҳангарон тумани ҳудудидан ўтган Олмалик-Тошкент автомобиль йўлининг 13-километрида юз берган. Унда Captiva, Lada Largus, Nexia–3, Shinerfly (микро автобус), Damas ҳамда Howo русумли автомашиналар бир йўналишда ҳаракатланиб келаётган вақтларида олдинма-кетин урилиб кетган.
ЙТҲ оқибатида Nexia–3 русумли транспорт воситаси йўловчиси — 1980 йилда туғилган Т.Г.га биринчи тиббий ёрдам кўрсатилган. Бошқа ҳаракат иштирокчиларининг соғлиғига зиён етмаган. Транспорт воситалари техник шикастланган.
Дастлабки суриштирувларга кўра, дала майдонида содир бўлган ёнғиндан ҳосил бўлган қора тутун ҳайдовчиларни бошқа автоуловларни кўрмай қолишига сабаб бўлган.
Ҳолат юзасидан тумани ИИБ ЙҲХБ томонидан суриштирув ишлари олиб борилмоқда.
