24–25 yanvar kunlari Toshkent viloyatining Bo‘stonliq tumanida Ekologiya, atrof-muhitni muhofaza qilish va iqlim o‘zgarishi vazirligi huzuridagi O‘rmon xo‘jaligi agentligi tomonidan 2025 yil – “Atrof-muhitni asrash va “yashil” iqtisodiyot yili” munosabati bilan o‘rmon xo‘jaliklarini rivojlantirish, amalga oshirilgan ishlar va istiqboldagi rejalar muhokamasiga bag‘ishlangan amaliy seminar o‘tkazildi.
Seminarda nutq so‘zlagan Aziz Abduhakimov Prezident tashabbusi bilan o‘rmonlarni asrab qolish borasida bir qancha ijobiy o‘zgarishlar yuz berayotganini taʼkidladi. Biroq, shunga qaramay, sohada hamon ayrim kamchiliklar saqlanib qolayotganini tanqid ostiga oldi.
Jahon banki mutaxassisi Asferachyu Abate O‘zbekistonda amalga oshirilayotgan loyihalar nafaqat tabiat muhofazasi, balki aholining turmush darajasini oshirish uchun ham ulkan imkoniyatlar yaratayotganini qayd etdi.
Seminarda KOISA (Koreya xalqaro hamkorlik agentligi) tashabbusi bilan 2024–2028 yillarda amalga oshiriladigan loyihaga ham eʼtibor qaratildi. Loyihada smart texnologiyalar yordamida o‘rmonlarni qayta tiklash, 6 ta smart issiqxona qurish, 1,7 mln tup xandon pista ko‘chatlarini yetishtirish, 5 gektar maydonda pistachilik ilmiy-tadqiqot stansiyasi tashkil etish, shaharlarni ko‘kalamzorlashtirish, 5 gektar hududda maxsus daraxt ko‘chatxonalari barpo qilish, 50 gektar maydonda shaharlar uchun moslashtirilgan ko‘chatlar yetishtirish, 300 000 tup daraxt o‘stirish kabi maqsadlar ko‘zda tutilgan. KOISA mutaxassisi Yoon Taegseung loyiha ekologik muhitni yaxshilash va aholi uchun qulay sharoitlar yaratishga qaratilganini taʼkidladi.
FAO bosh texnik maslahatchisi Narimon Nishonov esa tashkilot bilan hamkorlikda amalga oshirilayotgan o‘rmonlar va yaylovlarni barqaror boshqarish loyihasi mamlakatimizning iqlim o‘zgarishiga moslashish va tabiiy resurslardan samarali foydalanishga yo‘naltirilganligini aytib o‘tdi.
Taʼkidlash joizki, mazkur xalqaro loyihalar O‘zbekistonda o‘rmon xo‘jaliklarini barqaror rivojlantirishda muhim hisoblanadi. Asosiysi, mamlakatimizda amalga oshirilayotgan bu kabi islohotlar ekologik barqarorlikni taʼminlash va iqtisodiyotda “yashil” loyihalar ulushining sezilarli ortishiga xizmat qilishi bilan ahamiyatlidir.
Seminar yakunida kelgusida bajarilishi kerak bo‘lgan vazifalar belgilab olindi. Shuningdek, ishtirokchilarga tashakkurnoma va sertifikatlar topshirildi.