Португалияда кучли бўрон кузатилмоқда
Бўрон оқибатида автомагистраллар вақтинча ёпилган.
Португалия бўйлаб кечаётган кучли «Мартинё» бўрони йирик талафотларга сабаб бўлди. Шамол дарахтлар ва электр устунларини қулатди, томларни юлиб ташлади, транспорт ҳаракати издан чиқди. Расмийлар моддий зарар катта эканини билдирган, бироқ аниқ баҳолаш ҳали амалга оширилмаган.
Фуқаро муҳофазаси хизмати 20 март куни ярим тундан соат 11:00 гача 6000 га яқин ҳодисани қайд этди, уларнинг аксарияти Лиссабон ва унинг атрофида содир бўлган. Дастлабки маълумотларга кўра, олти киши енгил тан жароҳати олган, 22 та автомагистраль ёпилган, шунингдек, Тагус дарёси устидаги осма кўприк ҳаракат учун тўхтатилган.
Бўрон Коимбра туманидаги стадион трибуналарини қисман қулатди, Каскаис аэродромида эса бир нечта кичик самолётларни ағдариб юборди. Мадейра архипелагида ҳам 50 дан ортиқ фавқулодда ҳодиса қайд этилган.
Об-ҳаво шароити шанбагача ёмонлашиши кутилмоқда, сув тошқинлари хавфи мавжуд. «Мартинё» бўрони Испанияга ҳам таъсир қилган, Франциянинг жанубий ҳудудларида эса “тўқ сариқ” огоҳлантириш эълон қилинган.
