Surxondaryoda 3 nafar farzandiga aliment to‘lamaganligi uchun ikki yil oldin qidiruvga berilgan ota o‘z xonadonining yerto‘la qismidan topildi, deya xabar bermoqda Surxondaryo MIB Matbuot xizmati.
Aniqlanishicha, Angor tumanida yashovchi fuqaro f.m. turmush o‘rtog‘i bilan ajrashgandan so‘ng, 2019 yil yanvar oyidagi sud buyrug‘iga asosan voyaga yetmagan 3 nafar farzandiga aliment to‘lashi belgilangan. Hozirgi kunga qadar qarzdor ota aliment to‘lashdan bosh tortib kelgan.
MIB Angor tuman bo‘limi davlat ijrochisi qarzdorning yashash manziliga borib, yaqinlariga ijro ishi haqida tushuntirish bergan. Xonadondagi qoramolni xatlovga olish jarayonida qoramoldan ayrilishni istamagan xonadon egalari qarzdor uyning yerto‘lasiga yashirinib olganini aytishgan.
Qarzdor ota ishi jinoyat ishlari bo‘yicha Angor tuman sudida ko‘rib chiqilib, unga 51 mln so‘mdan ortiq aliment qarzdorligi sabab 15 sutkalik maʼmuriy qamoq jazosi tayinlangan.