РФ мудофаа вазири Сергей Шойгу Россиянинг Марказий Осиёдаги базалари қайси ҳолатда ҳаракатга келишини маълум қилди
Шойгунинг таъкидлашича, Қирғизистон ва Тожикистондаги ҳарбий базалар ушбу мамлакатлар Афғонистон йўналишида агрессияга учраса, тўлиқ ҳаракатга келади.
“Бизнинг Тожикистондаги базамиз етарли даражада мустаҳкам ва агар тўғридан-тўғри ҳужум рўй берса, Коллектив Хавфсизлик тўғрисидаги шартнома ташкилоти (КХШТ) чегаралари ҳимояси учун тўла ишга туширилади. Қирғизистондаги базалар ҳақида ҳам ҳудди шуни айтиш мумкин”, - деган Шойгу.
Россия мудофаа вазири шунингдек, “Толибон” билан эришилган келишув амалга оширилишига умид билдирган. Лекин ўтмишдаги тажрибаларни ҳисобга олиб КХШТ доирасидаги иттифоқчиларни ҳар томонлама қўллаб-қувватлаш зарурлигини айтган. Шойгунинг фикрича, буларнинг барчаси РФ хавфсизлиги учун ҳам муҳимдир.
Бундан аввал Афғонистонда “Толибон” ва ҳукумат ўртасида йирик шаҳарлар учун жанглар авж олгани ҳақида маълумот берилганди
