Juma kuni kechqurun Rossiya harbiy dronlari Ukrainadagi ikkinchi yirik shahar – Xarkovdagi tibbiyot muassasasi va boshqa obyektlarga zarba berdi. Mahalliy hokimiyat vakillarining ma’lum qilishicha, kamida besh kishi jarohatlangan.
Xarkov viloyati gubernatori Oleg Sinegubov Telegram orqali bergan bayonotida sakkizta dron shahar markazidagi uchta tuman bo‘ylab fuqarolik obyektlariga hujum uyushtirganini aytdi. Unga ko‘ra, besh kishi jarohatlangan, biroq shahar meri Igor Terehov bu raqamni yetti deb ko‘rsatdi.
Hujum oqibatida 50 dan ortiq bemor shifoxonadan evakuatsiya qilindi, yong‘inlar yuzaga keldi. O‘nlab binolar zarar ko‘rdi, ko‘p qavatli uylarda, avtomobil salonida va yirik gipermarketda derazalar sinib ketdi.
Bundan tashqari, Qora dengiz bo‘yida joylashgan Odessa shahrida ham dron hujumlari sodir bo‘ldi. Oqibatda xususiy uy va ishlab chiqarish korxonasi yong‘in ichida qoldi, bir kishi halok bo‘ldi, yana biri jarohat oldi.