Oliy sud matbuot kotibi xabar berishicha, Samarqand viloyatida xotini va qaynonasini o‘ldirgan erkakka sud hukmi o‘qildi.
Xabarda keltirilishicha, joriy yilning 18 iyul kuni soat 23:00 larda Pastarg‘om tumani Chandir qishlog‘ida yashovchi O. spirtli ichimlik va giyohvand modda taʼsirida o‘zaro nizo sababli ota uyiga ketib qolgan ayolining oldiga boradi.
U yerda oldindan kelishmay yurgan qaynonasi va xotini bilan janjallashib, ularni qo‘l va oyoqlari bilan shavqatsizlarcha kaltaklagan. Bundan tashqari, voqelikka guvoh bo‘lgan turmush o‘rtog‘ining ukasini ham do‘pposlagan. Badanning turli joylariga berilgan zarbalar oqibatida turmush o‘rtog‘i va qaynonasi vafot etgan.
Sudlanuvchi O. sud zalida o‘z aybiga iqror bo‘ldi:
“Xotinimni olib ketish uchun borgandim. Qaynonam bilan qaynukam olib ketmaysan deb, menga tashlanib qolishdi. Men shok holatga tushib, ularga qo‘l ko‘tarib qo‘ydim”.
Sud hukmiga ko‘ra, sudlanuvchi O. JKning 59-moddasi (bir necha jinoyat sodir etganlik uchun jazo tayinlash) tartibida 24 yil 6 oy ozodlikdan mahrum qilindi.
Eslatib o‘tamiz, avvalroq Qamashida dahshatli qotillik: 17 yoshli qiz qo‘shni yigitni 29 marotaba pichoqlagani hamda Andijonda aka o‘gay ukalarini chopib tashlagandi. Shuningdek, Samarqandda yer talashgan yigit pichoqlangani, voyaga yetmagan shaxs uch tengdoshiga pichoq urgani hamda qayniuka pochchasidan qasd olish uchun uning akasini pichoqlagani haqida xabar berilgandi.
Cho‘lponoy Ahmedova