Самарқандлик куёв хотини ва қайнонасини уриб ўлдириб қўйди
У 24 йил 6 ойга озодликдан маҳрум қилинди.
Олий суд матбуот котиби хабар беришича, Самарқанд вилоятида хотини ва қайнонасини ўлдирган эркакка суд ҳукми ўқилди.
Хабарда келтирилишича, жорий йилнинг 18 июль куни соат 23:00 ларда Пастарғом тумани Чандир қишлоғида яшовчи О. спиртли ичимлик ва гиёҳванд модда таъсирида ўзаро низо сабабли ота уйига кетиб қолган аёлининг олдига боради.
У ерда олдиндан келишмай юрган қайнонаси ва хотини билан жанжаллашиб, уларни қўл ва оёқлари билан шавқатсизларча калтаклаган. Бундан ташқари, воқеликка гувоҳ бўлган турмуш ўртоғининг укасини ҳам дўппослаган. Баданнинг турли жойларига берилган зарбалар оқибатида турмуш ўртоғи ва қайнонаси вафот этган.
Судланувчи О. суд залида ўз айбига иқрор бўлди:
“Хотинимни олиб кетиш учун боргандим. Қайнонам билан қайнукам олиб кетмайсан деб, менга ташланиб қолишди. Мен шок ҳолатга тушиб, уларга қўл кўтариб қўйдим”.
Суд ҳукмига кўра, судланувчи О. ЖКнинг 59-моддаси (бир неча жиноят содир этганлик учун жазо тайинлаш) тартибида 24 йил 6 ой озодликдан маҳрум қилинди.
Эслатиб ўтамиз, аввалроқ Қамашида даҳшатли қотиллик: 17 ёшли қиз қўшни йигитни 29 маротаба пичоқлагани ҳамда Андижонда ака ўгай укаларини чопиб ташлаганди. Шунингдек, Самарқандда ер талашган йигит пичоқлангани, вояга етмаган шахс уч тенгдошига пичоқ ургани ҳамда қайниука поччасидан қасд олиш учун унинг акасини пичоқлагани ҳақида хабар берилганди.
Чўлпоной Аҳмедова
