Сенатор Маҳаллабай ишлаш ва тадбиркорликни ривожлантириш агентлиги директорига сўров юборди

Бунинг сабаби шуки, Сенат томонидан жорий йил январь-февраль ойларида Сирдарё вилоятида ўтказилган ўрганишлар таҳлили вилоятда ҳоким ёрдамчиларининг кўмагида аҳолининг тадбиркорлик ташаббусларини қўллаб-қувватлаш, уларни даромадли меҳнат билан банд қилиш борасида салмоқли натижалар билан бирга бу борада ечимини кутаётган айрим масалалар мавжудлигини кўрсатган.

 

Сўровда қайд этилишича, 2023 йилда ташкил этилган 2 минг 824 та якка тартибдаги тадбиркорлик субъектининг 53,8 фоизи фаолиятини тўхтатиб қўйган.

 

Ҳоким ёрдамчилари кўмагида микролойиҳалар ва микромарказлар ташкил этиш ҳисобига аҳоли бандлигининг таъминланиши режага нисбатан атиги 36 фоизни ташкил қилган.

 

Имконият ва шарт-шароитлар етарли бўлишига қарамасдан Гулистон шаҳрида “Аёллар дафтари”га киритилган 890 нафар ишсиз хотин-қиздан атиги 15 нафари доимий меҳнат билан банд. Оқолтин тумани ва Ширин шаҳрида эса бундай тоифадаги хотин-қизлар бандлигини таъминлашда субсидиялаш механизмидан умуман фойдаланилмаган.

 

2023 йил мобайнида "20 минг тадбиркор – 500 минг малакали мутахассис” дастури доирасида 24 тадбиркорлик субъекти томонидан тижорат банкларига жами 112,8 миллиард сўмлик кредит олиш учун киритилган аризаларининг 17 тасига автоматик скоринг таҳлили орқали ижобий хулоса берилган бўлсада, амалда бор-йўғи 2 нафар тадбиркорга кредит ажратилган.

 

Ҳокимликларга аҳоли ва тадбиркорлик субъектларининг тадбиркорлик масаласидаги мурожаатлари сони ўтган йилга нисбатан икки баробарга ошган.

 

Юқоридагилардан келиб чиқиб, сенатор агентлик директоридан фаолияти тўхтаб қолган тадбиркорлик субъектларининг мавжуд муаммоларини Маҳаллабай ишлаш асосида ўрганиш ва бартараф этиш юзасидан кўрилаётган чоралар, оилавий тадбиркорликни ривожлантириш дастурлари доирасида имтиёзли кредит маблағларининг ўзлаштирилиши ҳамда субсидия маблағларининг ажратилиши паст бўлган ҳудудлардаги ҳоким ёрдамчиларининг масъулиятини ошириш каби йўналишларда амалга оширилаётган ишлар бўйича асослантирилган тушунтириш беришни сўради.

 

Сўровда маҳаллада бўш турган бино-иншоотлар ва ер майдонларини аниқлаш, уларни белгиланган тартибда аукцион савдоларига чиқариш, ушбу жараёнга тадбиркорлик субъектларини кенг жалб қилиш ишларининг ташкил қилинганлиги юзасидан маълумот тақдим этилиши кўрсатиб ўтилди.

 

Шу билан бирга, ҳоким ёрдамчилари меҳнатини муносиб баҳолаш ва уларни рағбатлантириш борасида Агентлик томонидан амалга оширилган ишлар ҳамда кўрилган чора-тадбирлар, шунингдек, ҳоким ёрдамчилари фаолиятига оид амалдаги қонунчиликни такомиллаштиришга қаратилган таклифлар тақдим этиш сўралди.