Сочида Ксения Собчак ўтирган машина ЙТҲ га учради
Ксения Собчак ўтирган автомобиль Адлер яқинидаги катта трассада "Volkswagen" билан тўқнашган. Йўл-транспорт ҳодисаси оқибатида "Volkswagen" ҳайдовчиси ва ичидаги йўловчи воқеа жойида ҳалок бўлган. Машинанинг орқа ўриндиғидаги яна бир йўловчи оғир аҳволда касалхонага ётқизилган.
"Daily Storm" берган маълумотга кўра, Ксения Собчак воқеа жойидан қочиб кетган.
"РEН" ТВ канали Собчак кетаётган машина ҳайдовчиси билан боғланган. Ҳайдовчининг сўзларига кўра, Собчак Нью-Йорк шаҳрига учиб кетиш учун аэропортга шошилиб кетаётган бўлган. ЙТҲ содир бўлгач, у кечикмаслик учун дарҳол машинадан тушиб, бошқа таксига ўтирган ва йўлида давом этган.
Ксения Собчак анча вақтгача бахтсиз ҳодиса юзасидан ҳеч қандай муносабат билдирмаган.
"Daily Storm" журналисти унинг ўзи билан боғланишга ҳаракат қилган, аммо боғланолмаган. Шундан сўнг унинг турмуш ўртоғи Константин Богомолов билан боғланган, лекин у журналистнинг саволларига жавоб бермаган. Шунингдек, Собчакнинг собиқ эри Максим Виторган ва онаси Людмила Нарусова ҳам муносабат билдиришдан бош тортган. Автоҳалокат тафсилотлари ижтимоий тармоқлар орқали кенг оммага тарқалганидан сўнг Ксения Собчак воқеага изоҳ қолдирган. Унинг сўзларига кўра, воқеа содир бўлган пайтда журналистнинг ўзи ҳам жароҳатланган. Кучли зарбдан ҳушини йўқотган ва бош мия чайқалиш аломатлари билан шифокорга мурожаат қилган.
"Воқеа содир бўлган вақт мен машинада эдим. Машина меники эмас, ҳайдовчисини ҳам танимайман. Шунчаки такси эди. Мен ҳайдовчини шоширмадим. Тезликни ошир деганим ҳам йўқ. Йўл давомида мен zoom орқали иш юзасидан гаплашиб кетаётган эдим, бу ҳақда ёзувлар ҳам бор. Тезликни оширганига келсак, бу ҳайдовчининг шахсий қарори эди", — деб ёзган журналист ўзининг Telegram каналида.
Бундан аввал Қорақалпоғистонда Қозоғистон фуқароси ЙТҲга учраб, вафот этгани ҳамда Москвада юк машинаси ва жамоат транспорти иштирокида ЙТҲ содир бўлгани ҳақида хабар берилганди.
Муножат Валиева
