Тошкент аэропорти назоратчиси пора билан қўлга тушди
У бошқа бир шахсни ишга киритиб қўймоқчи бўлган.
Тошкент халқаро аэропортининг назоратчиси 1800 АҚШ доллари олган вақтида ушланди. Бу ҳақда Давлат хавфсизлик хизмати хабар берди.
Маълумотларга кўра, Тошкент халқаро аэропортининг Авиация хавфсизлик хизмати қўриқлаш назоратчилар бўлинмаси назоратчиси A.B. хизмат мавқейидан фойдаланган ҳолда ўзганинг ишончига кириб, унинг пул маблағини ноқонуний тарзда ўзлаштиришни режа қилади.
Дастлаб у ижтимоий тармоқ орқали жабрланувчи билан танишади ва унинг қариндошини Тошкент халқаро аэропортининг Авиация хавфсизлик хизмати қўриқлаш назоратчилар бўлинмасига назоратчи сифатида ишга киритиб қўйиш эвазига 2 минг АҚШ доллари талаб қилади. Лекин жабрланувчи 1800 АҚШ доллари беришини маълум қилади.
2023 йилнинг 6 декабрь куни Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда, A.Б. 1800 АҚШ долларини олган вақтида ашёвий далиллар билан ушланди.
Ҳолат юзасидан A.Б. га нисбатан Жиноят Кодексининг 25,168-моддаси ва 28,211-моддаси билан жиноят иши қўзғатилиб, тергов ҳаракатлари олиб борилди. Жиноят ишлари бўйича Миробод туман суди томонидан эса A.Б. га нисбатан 2 йил муддатга озодликни чеклаш жазоси тайинланди.
