Тошкентда бир гуруҳ шахслар қарз масаласида муштлашди
Ҳолат юзасидан расмий муносабат билдирилди.
Ижтимоий тармоқда Тошкент шаҳрининг Юнусобод туманида бир гуруҳ шахслар фуқарони ураётганлиги акс этган видео тарқалиб, турли муҳокамаларга сабаб бўлмоқда. Ҳолат юзасидан шаҳар ИИББ расмий муносабат билдирди.
Ҳолат 1 июль куни соат 20:25 ларда Юнусобод тумани Ифтихор кўчасида юз берган. Унда олдиндан ўзаро таниш бўлган 6 нафар фуқаро қарз масаласида оғзаки жанжаллашган. Фуқаролар С.Қ., Д.Қ,, Ҳ.Қ.лар жамоат тартибини бузган ҳолда жамиятда юриш-туриш қоидаларини қасддан менсимай, Н.Т.ни уриб тан жароҳати етказишган. Сўнг Н.Т.ни ўзлари келган автомашинада уйи олдига олиб боришган.
Н.T.гa шифохонада бирламчи тиббий ёрдам кўрсатилганидан сўнг уйига кетган.
Мазкур ҳолат юзасидан Юнусобод тумани ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 277-моддаси («Безорилик») билан жиноят иши қўзғатилган. Гумон қилинувчилар процессуал тартибда ушланган.
