Ijtimoiy tarmoqda Toshkent shahrining Yunusobod tumanida bir guruh shaxslar fuqaroni urayotganligi aks etgan video tarqalib, turli muhokamalarga sabab bo‘lmoqda. Holat yuzasidan shahar IIBB rasmiy munosabat bildirdi.
Holat 1 iyul kuni soat 20:25 larda Yunusobod tumani Iftixor ko‘chasida yuz bergan. Unda oldindan o‘zaro tanish bo‘lgan 6 nafar fuqaro qarz masalasida og‘zaki janjallashgan. Fuqarolar S.Q., D.Q,, H.Q.lar jamoat tartibini buzgan holda jamiyatda yurish-turish qoidalarini qasddan mensimay, N.T.ni urib tan jarohati yetkazishgan. So‘ng N.T.ni o‘zlari kelgan avtomashinada uyi oldiga olib borishgan.
N.T.ga shifoxonada birlamchi tibbiy yordam ko‘rsatilganidan so‘ng uyiga ketgan.
Mazkur holat yuzasidan Yunusobod tumani IIO FMB huzuridagi Tergov bo‘limi tomonidan O‘zbekiston Respublikasi Jinoyat kodeksining 277-moddasi (“Bezorilik”) bilan jinoyat ishi qo‘zg‘atilgan. Gumon qilinuvchilar protsessual tartibda ushlangan.