Тошкентда шифохоналар беморни қабул қилишдан бош тортди
Тез ёрдам беморни 4 марта турли шифохоналарга олиб борган.
Ижтимоий тармоқларда Тошкент шаҳар тез тиббий ёрдам ходимлари бир беморни бир неча тиббиёт муассасасига олиб бориб, охирида уни кўп қаватли уй йўлагида қолдириб кетгани ҳақида хабар тарқалди. Республика тез тиббий ёрдам маркази бу ҳолат юзасидан расмий баёнот берди.
Маълум бўлишича, 1953 йилда туғилган, аниқ яшаш манзили бўлмаган фуқаро M.B. 2025 йил 23 февралдан бери тез тиббий ёрдам хизматига бир неча бор мурожаат қилган. Ҳар сафар унга зарурий тиббий хизматлар кўрсатилган ва у 4-сон ва 1-сон шаҳар клиник шифохоналарига бир неча маротаба олиб борилган.
6 март куни рўй берган воқеалар
Соат 10:53 да Бўзсув 1/21 манзилидан чақирув келган. Тез ёрдам бригадаси беморни текшириб, 1-сон шаҳар клиник шифохонасига олиб борган. Шифокорлар шошилинч ҳолат йўқлигини айтиб, беморни қабул қилмаган. Яшаш манзили аниқ бўлмагани сабабли «102» хизматига хабар берилиб, у яна аввалги жойига қайтарилган.
Соат 13:34 да шу манзилдан ички ишлар ходими яна чақирув берган. Беморга тиббий ёрдам кўрсатилган, сўнг у ўзининг яшаш манзилини Бунёдкор кўчасидаги 421-уй деб кўрсатгани сабабли тегишли хизматлар билан келишилган ҳолда у ерга олиб борилган.
Соат 19:48 да шу манзилдан йўловчи томонидан яна чақирув қилинган. Тез ёрдам бригадаси беморни текшириб, шошилинч ҳолат йўқлиги сабабли уни ўша жойнинг ўзида қолдирган.
Соат 20:31 да Ички ишлар ходими яна чақирув берган. Тез ёрдам хизмати беморни кўрикдан ўтказиб, ИИБ ходимининг илтимосига кўра яна 1-сон шаҳар клиник шифохонасига олиб борган. У ерда шифокорлар унга "ўнг томонда йирингли яра" ташхисини қўйиб, касалхонага ётқизишган.
Айни пайтда фуқаро M.B. Республика ихтисослаштирилган онкология ва радиология илмий-амалий тиббиёт марказининг Тошкент шаҳар филиалида режали муолажалар олмоқда.
