Tramp raqamli aktivlar haqidagi farmoniga tayanib, yangi kriptorezerv yaratilishini maʼlum qildi. 23 yanvarda imzolangan ushbu hujjatda kriptovalyutalar tilga olingan bo‘lsada, davlat zaxirasi haqida aniq maʼlumot berilmagan.
Bu farmon asosida prezident maslahatchisi rahbarligida maxsus ishchi guruh tuzilgan bo‘lib, uning tarkibiga moliya vaziri, bosh prokuror, savdo vaziri va boshqa rasmiylar kiritilgan. 2 mart kuni Tramp aynan shu guruh kriptorezervni tashkil qilishini tasdiqladi.
Tramp kriptorezerv tarkibiga XRP (Ripple), SOL (Solana) va ADA (Cardano) kiritishni rejalashtirayotganini aytdi. Bu xabardan so‘ng ushbu kriptovalyutalar narxi 10-35 foizga oshdi. Boshqa kriptovalyutalar, jumladan, bitkoin ham qimmatlashdi.
Tramp bu tashabbusni kriptoindustriyani rivojlantirish va AQSHni jahon kriptovalyuta markaziga aylantirish uchun muhim qadam deb baholadi.